(પ્રતિનિધિ) ગોધરા,તા.22
ગોધરા શહેરના જૂના ડાકોર રોડ ઘાસ ગોડાઉન પાસે આવેલા મુન્ના ફળિયા વિસ્તારમાં વહેલી સવારના ત્રણથી ચાર વાગ્યાના આરસામાં એક યુવાન ઉપર તલવાર સહિતના ઘાતક હથિયારોથી જીવલેણ હુમલો કરાયો હતો. જેમાં યુવાન લોહીથી લથપથ હાલતમાં જમીન ઉપર પડી રહ્યો હતો. જો કે આજુબાજુના સ્થાનિક લોકો તાત્કાલિક દોડી આવી યુવકને 108 એમ્બ્યુલન્સ મારફતે ગોધરા સિવિલ હોસ્પિટલમાં સારવાર અર્થે લાવવામાં આવ્યો હતો પરંતુ યુવકની હાલત અત્યંત ગંભીર હોવાના કારણે તાત્કાલિક વડોદરા હોસ્પિટલ ખાતે રિફર કરવામાં આવ્યો હોવાનું જાણવા મળે છે.જ્યાં યુવકે અંતિમ શ્વાસ લીધો હતો હાલ તો ગોધરા બી ડિવિઝન પોલીસ દ્વારા તમામ ઘટનાની તપાસ હાથ ધરવામાં આવી છે. ગોધરા શહેરના જૂના ડાકોર રોડ પાસે આવેલ ઘાસ ગોડાઉન વિસ્તારમાં મુન્ના ફળિયા આવેલું છે જ્યાં વહેલી સવારના ત્રણથી ચાર વાગ્યાના આરસામાં મોહસીન મોહમદ હનીફ ભાગલીયા ઉર્ફે ચૂચલા નામનો યુવક અહીંયાથી પસાર થઈ રહ્યો હતો. ત્યારે અનવર બસીર હયાત અને સાજીદ ઇસ્માઇલ ભમેડીએ તુ કેમ અમારી સાથેના 307ના મેટરમાં સમાધાન કરતો નથી તેમ કહીને લોખંડની પાઇપ, તલવાર, લોખંડના હથોડાથી હુમલો કર્યો હતો. આખા શરીર ઉપર ઘા મારીને જમીન ઉપર પાડી દીધો હતો. જો કે લોહીથી લથપથ હાલતમાં પડી રહેલ મોહસીન ચૂચલા ને આજુબાજુના સ્થાનિક લોકો તાત્કાલિક દોડી આવી અને 108 એમ્બ્યુલન્સ દ્વારા ગોધરા સિવિલ હોસ્પિટલ ખાતે પહોંચાડ્યો હતો. જ્યાં યુવકની હાલત ગંભીર હોવાના કારણે ગોધરા સિવિલ હોસ્પિટલે રીફર કરી વડોદરા હોસ્પિટલ ખાતે મોકલી આપ્યો હતો. જ્યાં વડોદરા હોસ્પિટલ ખાતે મોહસીન ચૂચલા અંતિમ શ્વાસ લીધો હતો. હાલ તો ગોધરા બી ડિવિઝન પોલીસ ઉપર મોહસીન ચૂચલા ઉપર હુમલો કરનારા બે આરોપી સામે ગુનો નોંધી તેમની ધરપકડના ચક્રો ગતિમાન કર્યા છે.